Karin:
„Mir luege uf e Johr wo uns Freud, Zfrideheit, Hoffnig, aber au
Abschiedneh und Truur brocht het zrugg.
38 mol hänn mir probt und 15 mol in dr
Kirche gsunge
10 Chörler kriege als Dank für dr gueti
Bsuech, e klyns Gschänk.
D’Höhepunk sin wider d’Oschtere,
Pfingsten, Martini und Wiehnachte gseh.
E grossi Freud hämmer de Bewohner vom
Altersheim Möhli mit unserem Singe am 20. März gmacht.
Dr Maibummel isch uf Frick gange, wo mir
im Kuenz sin go brönsche. Unser tradizionels Pizzaässe het bim Chinees
stattgfunde, und isch ganz glatt gseh.
Am 29. Juli isch unsere Herbi gschtorbe
und am 6. Auguscht hänn mir ihm die letschti Ehr erwise. Dr Herbi isch
1976 in dr Kirchechor yträte.E Johr spöter isch är in dr Vorstand
gwählt worde, zerscht als Kassier und dnoch als Vizepresidänt. bis zu
sinere Kranket isch är Vize und im Chor aktiv gseh. Mit em Lied bei
Gott bin ich geborgen wänn mir an ihn dänke.
Am 15 Auguscht isch dr
Abschydsgottesdienscht vom Berhard gseh.
Am 12. März isch in Rhyfälde d’ Delegierte
Versammlig gsi, Chorleiter und Präsidente Versammlig am 10. Novämber.
Mir hänn en erschte Blick ufs Programm vom Fricktaler Kreiscäcilietag
wo am 10. Septämber 2005 stattfindet, chönne wärfe.
3 Vorstandssitzige hänn mir abghalte.
3 Sitzige für s’Oberstuefezentrum hänn stattgfunde.
So isch au das Johr verbi gange und ich
möcht allne danke, im Chorleiter, dr Musikkommission, de
Vorstandsmitglider und natürlich au de Sängerinne und Sänger.
Ich wünsch Euch und eure Familie Gsundheit
und Gottessäge.“